Azərbaycan Respublikasının Prezidenti Zati-aliləri cənab İlham Əliyevə Hörmətli cənab Prezident.
Sizi doğum gününüz münasibətilə Gürcüstan Azərbaycanlılarının İnteqrasiya Mərkəzinin kollektivi adından səmimi-qəlbdən təbrik edir, Sizə dərin hörmət və ehtiramımızı bildirirəm.
Sizin müdrik və uzaqgörən rəhbərliyiniz altında Azərbaycan Respublikası son illər ərzində dinamik inkişaf yolu keçmiş, güclü və nüfuzlu dövlətə çevrilmişdir. Dövlət müstəqilliyinin möhkəmləndirilməsi, milli maraqların qətiyyətlə qorunması və xalqın rifahının yüksəldilməsi istiqamətində həyata keçirdiyiniz ardıcıl və prinsipial siyasət Azərbaycan xalqının Sizə olan böyük inam və etimadının bariz ifadəsidir.
Bu uğurlu siyasi xəttin ən parlaq nəticələrindən biri isə Sizin Ali Baş Komandan kimi rəhbərliyinizlə qazanılmış tarixi Zəfərdir. Həmin Zəfər Azərbaycan dövlətçiliyinin şanlı səhifələrindən biri olmaqla yanaşı, xalqımızın birlik və əzminin, Sizin isə güclü siyasi iradənizin aydın göstəricisidir. Bu Qələbə bu gün bütün dünya azərbaycanlıları üçün qürur və mənəvi güc mənbəyinə çevrilmişdir.
Eyni zamanda, xaricdə yaşayan soydaşlarımızın, o cümlədən Gürcüstan azərbaycanlılarının milli-mədəni kimliyinin qorunmasına, ana Vətənlə əlaqələrinin möhkəmləndirilməsinə göstərdiyiniz diqqət və qayğı xüsusi rəğbətlə qarşılanır və yüksək dəyərləndirilir.
Doğum gününüz münasibətilə Sizə möhkəm cansağlığı, uzun ömür və ailə səadəti arzulayıram. Azərbaycan dövlətinə və xalqına xidmət yolunda ali vəzifənizin icrasında Sizə daim uğurlar diləyirəm. Əminəm ki, Sizin rəhbərliyinizlə Azərbaycan bundan sonra da böyük nailiyyətlər əldə edəcək, beynəlxalq nüfuzunu və inkişaf tempini ardıcıl şəkildə yüksəldəcəkdir.
Dərin hörmətlə, Murad Muradov Gürcüstan Azərbaycanlılarının İnteqrasiya Mərkəzinin icraçı direktoru